Извршната директорка, Наташа Сивевска, беше дел од учесниците – меѓу кои и компании и здруженија од текстилниот сектор – кои се собраа на 12 март 2025 во Малага за да учествуваат на првата работилница на VERDE Академијата посветена на европските политики за циркуларност во текстилната индустрија. Настанот беше организиран од страна на Corporación Tecnológica de Andalucía (CTA), Центарот за истражување и технологија – Хелас (CERTH) и DIADYMA, во рамките на форумот Transfiere 2025.

Како појдовна точка беше земена неодамнешната ревизија на Директивата на ЕУ за управување со отпад, која предвидува одделно собирање на текстилен отпад и воведување на шеми за продолжена одговорност на производителите (EPR) за текстилните компании. Учесниците на работилницата дискутираа за спроведувањето и влијанието на овие политики на локално ниво и разгледаа можни акциски чекори.

На работилницата присуствуваа повеќе од 40 учесници од осум земји: Шпанија, Италија, Грција, Бугарија, Северна Македонија, Португалија, Словенија и Либан. Меѓу присутните беа претставници од организации како што се: Конфедерацијата на текстилната индустрија (Texfor), Фондацијата Ciedes, Ибериската асоцијација за рециклирање текстил (Asirtex), Mayoral, Texlimca, Шпанската асоцијација за одржливост, иновации и циркуларност во модата (SIC Moda), The Loop Alliance, здружението Visión Circular и T-Neutral.

Состанокот започна со презентација на Давид Аљо , раководител за одржливост при Texfor, кој го претстави правниот контекст на текстилниот сектор и сподели неколку успешни приказни од организации и проекти фокусирани на циркуларност. Потоа, Лаура Роблес, раководителка на проекти во Фондацијата Ciedes, ја презентираше работата на Форумот на Глобалната Метропола Малага – платформа составена од советници од 38 општини. Овој форум е посветен на носење одлуки за клучни прашања поврзани со стратешкото планирање на метрополската област на Малага, како што е селективното собирање на текстилен отпад.

Тестирање на Платформата за знаење и Управниот комитет

Покрај првиот настан на VERDE Академијата, партнерите на проектот VERDEinMED одржаа сесија за тестирање на Платформата за знаење на 11 март. Настанот се одржа во хибриден формат и обедини експерти од текстилниот сектор кои заеднички ја анализираа оваа веб-алатка и предложија подобрувања пред нејзиното официјално пуштање. Сесијата ја водеше Жозеп Касамада, проектен менаџер на кластерот Tèxtils.CAT. Учествуваа и експерти од Стопанската комора на Русе, AITEX, Универзитетот во Кордоба, Универзитетот на Западна Атика, Hilo Color Plus и TITERA.

На истиот ден, партнерите и соработниците на проектот VERDEinMED го одржаа своето трето заседание на Управниот комитет, на кое се разгледуваа досега реализираните активности и се планираа претстојните.

Беше вистинско задоволство да се споделат вакви инспиративни моменти во Малага!

Нашата следна дестинација е Сараево во април, каде што ќе учествуваме на третото собирање на ISE заедницата на пракса (Community of Practice – CoP) во рамките на програмата Interreg Euro-MED! ✈️