На 26 февруари 2026 година, Текстилната трговска асоцијација – Текстилен кластер, во соработка со SIPPO, организираше онлајн настан "Текстилната индустрија во Северна Македонија: проценка на отпадот, извозни трендови и циркуларни решенија" посветен на актуелните состојби и идните насоки на развој на текстилниот сектор во Северна Македонија.

Во рамки на настанот беа презентирани клучни наоди од анализата на македонската текстилна и индустријата за облека, со фокус на извозните трендови во последните две децении, структурните промени во секторот и позиционирањето на европските пазари. Посебно беа истакнати сегментите каде постои потенцијал за раст, како и предизвиците поврзани со конкурентноста, работната сила, финансирањето и сè повисоките барања за одржливост и транспарентност. Дополнително, беа претставени резултатите од проценката на индустрискиот текстилен отпад што се генерира во текот на производството. Анализата комбинираше податоци за увоз на материјали, извоз на готови производи и интервјуа со компании, со цел да се обезбеди реална и конзистентна основа за планирање идни мерки за намалување, третман и рециклирање на отпадот од производство.